Американскиот претседател Доналд Трамп предизвика лавина реакции на социјалните мрежи откако сподели концепт за нова генерација униформи на американските Вселенски сили.
Графиката објавена на неговата платформа Truth Social прикажува темносива униформа со висока јака, црн ремен, високи црни чизми и капа, дополнета со препознатливите обележја на Space Force.
Но вниманието не го привлече само изгледот.
Во самата графика се наведува дека концептот е инспириран од „дисциплината и функционалноста“ на униформите од култниот научнофантастичен филм „Starship Troopers“ од 1997 година.
Токму тоа предизвика бројни коментари и потсмевање на интернет.
„Starship Troopers“, во режија на Пол Верховен, е познат како сатиричен приказ на милитаристичко и авторитарно општество, а визуелниот стил на филмот намерно користи елементи кои асоцираат на фашистичка пропаганда.
Затоа дел од коментаторите веднаш се запрашаа дали авторите на концептот воопшто ја разбрале пораката на филмот.
Други, пак, забележаа дека униформата силно потсетува и на офицерите на Галактичката Империја од „Star Wars“.
Модни и политички коментатори на социјалните мрежи се пошегуваа дека дизајнот повеќе изгледа како костим на негативците во научнофантастичен филм отколку како униформа на современа американска воена гранка.
Реакциите дојдоа од различни страни на американскиот политички спектар, вклучувајќи и дел од конзервативните коментатори кои инаку го поддржуваат Трамп.
Сепак, засега нема потврда дека објавениот дизајн ќе стане официјална униформа на Вселенските сили.
Американските Space Force во јануари годинава веќе формално го претставија својот нов службен дизајн и започнаа процес за негово постепено воведување. Новата официјална униформа била развивана со учество и повратни информации од самите припадници на силите.
Поради тоа, графиката што ја сподели Трамп засега повеќе претставува концепт објавен на социјалните мрежи отколку официјално најавена промена на воената униформа.
Дали необичниот дизајн инспириран од „Starship Troopers“ некогаш ќе стигне подалеку од интернетот, засега останува непознато.
