Кина подготвува построги правила за заштита на интелектуалната сопственост во областа на вештачката интелигенција, алгоритмите и дигиталните содржини, како дел од новиот петгодишен план за периодот од 2026 до 2030 година.
Пекинг планира да ги усоврши правилата за заштита на интелектуалната сопственост за содржините генерирани со вештачка интелигенција, алгоритмите и платформската економија.
Посебен фокус ќе биде ставен и на новите технологии и индустрии, меѓу кои вештачката интелигенција, големите бази на податоци, блокчејн и облачното компјутерство.
Кинеските власти планираат да ја засилат и заштитата на авторските права во интернет-издаваштвото, аудиовизуелните содржини, онлајн литературата и другите книжевни и уметнички дела што се дистрибуираат преку интернет.
Потребата од посилна правна заштита станува сè поголема поради растечкото меѓународно присуство на кинеските филмови, телевизиски продукции, видеоигри, веб-романи и други дигитални производи.
Како дел од планот, Кина ќе воспостави и база на случаи поврзани со прекугранични спорови за интелектуална сопственост, со цел подобро справување со правните ризици на меѓународните пазари.
Пекинг истовремено планира да ја зајакне соработката со Светската организација за интелектуална сопственост – WIPO, како и со други меѓународни институции и големи трговски партнери.
Кина сака до 2030 година да постигне значителен напредок кон позиционирање како глобална сила во областа на интелектуалната сопственост, а до 2035 година нејзината конкурентност во оваа област да биде меѓу највисоките во светот.
Една од конкретните цели е индустриите поврзани со авторските права до 2030 година да учествуваат со 7,53 проценти во кинескиот бруто-домашен производ.
Новите правила доаѓаат во време на забрзан развој на генеративната вештачка интелигенција, кој ширум светот отвора сè повеќе прашања за тоа кој ги поседува правата врз содржините создадени со помош на AI и како треба да се заштитуваат оригиналните авторски дела.
