Замислете да се возите во автомобил кој изгледа како да излегол од некој анимиран филм – и тоа буквално. Италијанецот Андреа Мараци ја земал класичната Fiat Panda од 1993 година и ја претворил во нешто што изгледа како цртанка на тркала: возило широко само 48 сантиметри!
Од компактна четири-седалка, оваа „мини-Panda“ стана тешко остварлив едносед – или поточно, тесносед. Сопственикот мора да биде акробат за да ги собере и двете раце внатре, а за сопатникот има резервирано „седиште“ – поставено над задниот браник, речиси како шега.
Овој радикален проект не е официјален експеримент од Fiat, иако многумина се излажале – благодарение на неверојатната прецизност и завршна обработка што изгледа како фабрички прототип. Но, зад ова ремек-дело стои исклучиво фантазијата и посветеноста на еден ентузијаст, кој вложил цела година за да го доведе своето лудило до совршенство.
Иако изгледа како хибрид меѓу автомобил и мотоцикл, чудото на Мараци сè уште има четири тркала, оригиналните 13-инчни гуми и – за изненадување – електричен 24-волтен DC мотор под хаубата. Брзината? Околу 15 км/час – идеално за прошетки по тротоар, но не очекувајте остри свиоци.
Оваа Panda можеби не е за секојдневна употреба, но дефинитивно е нова дефиниција за урбана уметност на четири тркала.
