Во текот на вчерашниот и денешниот ден (19 и 20 ноември), полициските службеници од повеќе сектори и одделенија за внатрешни работи низ државата реализираа низа превентивно-едукативни кампањи насочени кон безбедноста во сообраќајот во зимски услови, заштита на граѓаните од имотни деликти и телефонски измами, како и сузбивање на меѓуврсничкото, семејното и сајбер-насилството.
Заштита од џебни кражби и телефонски измами
На градскиот пазар во Штип, Отсекот за превенција при СВР Штип ја спроведе кампањата „Да се заштитиме од џебни кражби“. Преку директни средби и делење едукативни летоци, граѓаните добија совети за самозаштита од имотни деликти, со посебен акцент на навременото пријавување на бесплатниот број 112.
Слични активности за заштита на имотот беа спроведени и на подрачјето на ПСОН Аеродром во Скопје преку кампањата „Внимавај, телефонски измами“, како и во Пензионерскиот дом во Делчево. Таму, полициски службеници од ОВР Делчево, РЦ за ГР Исток и ПО Македонска Каменица ги предупредија повозрасните граѓани да не наседнуваат на лажни повици во кои непознати лица бараат пари под изговор дека член на нивното семејство доживеал сообраќајна незгода или е в болница. Апелот е секоја информација директно да се проверува со семејството, а сомнителните повици веднаш да се пријавуваат на 192 или 112.
Безбедност во сообраќајот и подготовка за зима
Голем дел од активностите беа посветени на сообраќајната култура и задолжителната зимска опрема:
- Скопје и Штип: На подрачјето на ПСОН Центар (во соработка со РСБСП) и во централното градско подрачје на Штип беа реализирани кампањите „Биди подготвен за безбедно патување во зима“ и „Носи појас“, при што на возачите им беше укажано на обврската за поседување зимска опрема и користење безбедносен појас.
- Крива Паланка: Полициски службеници од ПС за граничен надзор Деве Баир и ПСОН Крива Паланка спроведоа акција под мотото „Вози одговорно“, советувајќи ги возачите да ја прилагодат брзината кон условите на патот и да не користат мобилен телефон при возење.
- Пелагониски и Преспански регион: Во Прилеп, Ресен, Демир Хисар, Македонски Брод и Ропотово, во соработка со РСБСП, на возачите на излезите од градовите и во централните подрачја им беа поделени летоци со пораки за одговорно возење во зимски услови.
- Пробиштип: Полицијата ги реализираше акциите „Одговорно пред пешачки премин“ и „Паркирај совесно, паркирај одговорно“, насочени кон подигање на свеста и кај пешаците и кај возачите.
- Едукација на најмладите и идните возачи: Во ОУ „Никола Карев“ во кочанското село Тркање се одржа предавање за основните сообраќајни правила за првоодделенците, додека СВР Тетово во приватното училиште „Мариф“ и СЕУ „8-ми Септември“ продолжи со проектот „Учам–Полагам–Возам“ наменет за средношколците од трета година.
Борба против врсничкото, семејното и сајбер-насилството
Одделението за превенција при СВР Скопје реализираше три работилници за деветтоодделенците во ООУ „Петар Поп Арсов“ и две трибини со средношколците од СУГС „Ѓорги Димитров“ и СУГС „Орце Николов“ на тема „СТОП за меѓуврсничко насилство – булинг, сајбер-булинг и превенција од зависности“. Учениците беа запознаени со облиците на физичко и психичко насилство, законските овластувања на полицијата и казнените одредби.
Воедно, СВР Битола одржа работилница со советот на родители во ОУ „Крсте П. Мисирков“ во село Бистрица на тема врсничко и семејно насилство, додека полициски службеници од ПС Делчево учествуваа на состанок на Општинскиот совет за превенција од детско престапништво, каде беа разгледани годишните едукативни програми за училиштата против булинг, алкохол, никотин, игри на среќа и употреба на пиротехника.





