СВР Тетово поднесе кривична пријава против 52-годишниот С.Р. од селото Камењане, Општина Боговиње, поради сомнение дека сторил кривично дело „измама“.
Според информациите од Министерството за внатрешни работи, осомничениот наводно довел во заблуда едно лице, убедувајќи го дека може да посредува за неговата сопруга да оствари право на туѓа нега, како и да обезбеди социјален стан.
Во текот на измамата, оштетениот му исплатил вкупно 5.150 евра, верувајќи дека ќе ги добие ветените услуги.
По спроведената истрага и целосното документирање на случајот, полицијата поднела кривична пријава против осомничениот до надлежното обвинителство.
Напомена: Лицето е осомничено, а за неговата евентуална вина ќе одлучува надлежен суд во законски пропишана постапка.
