Министерот за здравство учествуваше на работилницата каде што беа презентирани резултатите од Националната проценка на квалитетот, подготвена во соработка со СЗО Македонија (WHO Macedonia) и Агенцијата за квалитет и акредитација на здравствените установи (АКАЗУМ).
Тој потсети дека уште додека ја вршеше функцијата директор на Фондот за здравствено осигурување (ФЗО), се залагаше за подобрување на стандардите и поврзување на финансирањето со квалитетот, а сега тие иницијативи мора да прераснат во национална политика.
Главниот заклучок од извештајот е дека иако постојат закони, стратегии и системи, тие сè уште не функционираат синхронизирано како една целина. Поради тоа, Министерството за здравство ќе се фокусира на три клучни приоритети:
- Безбедност на пациентите: И пациентите и здравствените работници сè уште имаат страв да пријават грешка. Пријавувањето мора да биде заштитено за да може да се учи од пропустите, бидејќи грешката што не е пријавена е грешка што ќе се повтори.
- Пари за квалитет, а не само за обем: Финансирањето во здравството ќе се врзува за квалитетот на дадените услуги, наместо само за бројот на извршени прегледи или процедури.
- Јасна одговорност: Прецизно утврдување на обврските за секоја институција поединечно.
Министерот за здравство најави изработка на оперативен Национален план за квалитет со јасни одговорности и реални рокови, нагласувајќи дека ова нема да биде уште еден документ оставен на хартија, бидејќи квалитетот е директна обврска кон секој пациент.
