Една невладина организација од северна Грција, обвинета за злоупотреба на кампањи за собирање помош за деца заболени од рак, наводно пренасочувала донации на приватни сметки, уплати за обложување, како и во компании поврзани со раководството на таа организација, пренесе денеска „Катимерини“, повикувајќи се на резултатите од полициската истрага.
Како што се наведува, истражителите документирале 92 кампањи кои ги покренала организацијата „Paidiki Hara“ („Детска радост“), а кои се однесувале на 55 деца.
Триесет и пет родители изјавиле пред надлежните органи дека не знаеле оти донациите, уплатени преку системот IRIS, завршувале на приватни сметки или на Пејпал (PayPal) налогот на споменатата невладина организација.
Што откри истрагата?
Според наодите од истрагата:
- Семејствата добиле околу 1,12 милиони евра
- Самата организација забележала прилив на донации во износ од 3,99 милиони евра
Истражителите проценуваат дека повеќе од 250.000 евра, за кои се сомнева дека се проневерени, биле вложени во два аматерски фудбалски клуба во областа Пиерија.
Случајот исто така опфаќа сомнежи за наместени натпревари и активности поврзани со обложување, како и пораки во кои се зборува за исплати со цел влијание врз исходот на еден натпревар во септември 2026 година.
Судската документација содржи детали за уплати за обложување кои ги вршел обвинетиот раководител. Според наводите на истражителите, тие износи не биле во согласност со неговите пријавени приходи.
