Унгарската нискобуџетна авиокомпанија „Виз Ер“ започнува значајно проширување на своите операции од базата во Братислава, со воведување низа нови авионски линии низ Европа. Најзначајната новина за македонските патници е најавата за директна авионска врска меѓу Братислава и Охрид, која е планирано да започне со работа во март 2026 година.
Директорот на аеродромот „М. Р. Штефаник“ во Братислава, Душан Новота, потврди дека „Виз Ер“ веќе стационирал втор авион во словачката престолнина, додека уште два се најавени за пролетта 2026 година. Со тоа, базата во Братислава ќе располага со вкупно четири авиони од типот „Ербас А321нео“.
Нови дестинации од Братислава
Од средината на декември веќе се воспоставени нови линии од Братислава кон Аликанте, Осло, Атина, Базел, Неапол и Палермо, како и кон Ниш во Србија. Сепак, најинтензивниот бран на нови авиолинии се очекува на почетокот на следната година.
Менаџерката за комуникации на „Виз Ер“, Оливија Харангозо, најави дека во март 2026 година ќе биде пуштен во употреба значително проширен распоред на летање.
„Во 2026 година ќе понудиме вкупно 29 авиолинии од Братислава. Само во март воведуваме повеќе нови дестинации, меѓу кои се Охрид, Тирана, Приштина, Берлин, Дортмунд, Рим, Тел Авив, Варшава и Тузла“, изјави Харангозо.
Нов поттик за регионалното поврзување
Со новите линии, „Виз Ер“ дополнително ја зајакнува својата присутност во регионот. Компанијата веќе оперира на релацијата Братислава – Скопје, а воведувањето на директен лет до Охрид се очекува да придонесе за зголемување на туристичкиот интерес, особено од земјите на Централна Европа.
Покрај Северна Македонија, „Виз Ер“ од Братислава ќе воспостави и нови или веќе активни линии кон:
- Косово – Приштина (од март 2026);
- Албанија – Тирана (од март 2026);
- Србија – Ниш (веќе активна);
- Босна и Херцеговина – Тузла (од март 2026).
Вкупно, авиокомпанијата ќе нуди 32 авиолинии од Словачка, што значително ќе ја подобри поврзаноста на регионот и ќе отвори нови можности за патување и туризам.
