Управата за финансиска полиција поднесе кривична пријава против две физички лица и едно правно лице поради сомнение за сериозно даночно затајување, со кое, според надлежните, буџетот на државата бил оштетен за повеќе од 12,6 милиони денари.
Пријавата е доставена до Основното јавно обвинителство Скопје, а лицата се сомничат за сторено кривично дело „даночно затајување“ согласно член 279 од Кривичниот законик.
Според информациите од Финансиската полиција, првопријавениот Н.О., државјанин на Турција и реален сопственик и управител на компанијата, во периодот од 2016 до 2021 година, наводно презел дејствија со цел да избегне плаќање даночни обврски и да ја присвои трговската стока на фирмата.
Во тој период, според пријавата, била направена промена во сопственичката и управувачката структура на правното лице, при што како нов сопственик и управител бил запишан второпријавениот Е.М.
Финансиската полиција утврдила дека за деловните години 2022, 2023, 2024 и 2025 не биле изготвени и доставени завршни сметки, поради што залихи во вредност од 32.054.759 денари, кои биле заведени како трговска стока, биле неосновано присвоени.
Дополнително, според наводите во пријавата, не бил пресметан, пријавен и уплатен данок на додадена вредност (ДДВ) во износ од 5.769.856 денари, како и данок на личен доход од 3.561.283 денари.
Истражителите наведуваат и дека осомничените не ги отпишале ниту ги прикажале како приходи застарените краткорочни обврски кон добавувачи постари од три години. Станува збор за обврски во вкупна вредност од 32.847.325 денари, поради што, според Финансиската полиција, не бил пресметан и платен данок на добивка во износ од 3.284.732 денари.
Со сите овие дејствија, како што информираат од Управата за финансиска полиција, пријавените наводно не пресметале, не пријавиле и не уплатиле даночни обврски во вкупен износ од 12.615.871 денари, со што бил оштетен Буџетот на Република Северна Македонија.
Предметот сега е во рацете на Основното јавно обвинителство Скопје, кое треба да ги преземе понатамошните процесни дејствија и да утврди дали постојат доволно докази за продолжување на постапката.
