Полициски службеници од СВР Струмица реализирале акција во која бил приведен 48-годишен жител на Струмица, откако при претрес во неговиот дом биле пронајдени повеќе видови наркотични средства и предмети за кои постои сомневање дека биле користени за нивно чување и подготовка.
Според информациите од Министерството за внатрешни работи, претресот бил извршен на 14 јули околу 22:05 часот, по претходно издадена судска наредба.
При контролата во домот на Љ.Ѓ., полицијата пронашла пакувања со кокаин, хероин и марихуана, како и околу 400 семки од канабис. Освен наркотичните средства, биле пронајдени и други предмети кои се поврзуваат со нивно чување и употреба, меѓу кои шприц со течност, дигитална вага со остатоци од прашкаста материја и дополнителни предмети.
За случајот бил известен јавен обвинител од Основното јавно обвинителство Струмица. Од МВР информираат дека по целосното документирање на настанот, против осомничениот ќе биде поднесена соодветна кривична пријава.
Истрагата продолжува со цел да се утврдат сите околности околу пронајдената дрога и евентуалната поврзаност со други лица.
