На денешното рочиште за предметот поврзан со злоупотребите на средствата од ИПАРД програмата, во судницата беа преслушани дел од телефонските разговори обезбедени со посебни истражни мерки.
Во разговорите, според обвинителството, се слушаат комуникации меѓу дел од обвинетите, како и лица кои не се опфатени со обвинението. Меѓу нив е и поранешна вработена во Министерството за земјоделство, која претходно призна вина за примање поткуп и беше осудена на затворска казна.
Обвинителството тврди дека во снимките се разговара за исплата на договорени суми, при што се споменуваат 30.000 и 50.000 евра. Според нивните наводи, еден од обвинетите ветил 50.000 евра за да се влијае врз постапката за доделување средства од ИПАРД програмата.
Одбраната, пак, ги оспори доказите, оценувајќи дека станува збор за разговори без конкретна потврда за сторено кривично дело. Адвокатите посочија дека во ниту еден разговор директно не се докажува дека нивниот клиент нудел или барал поткуп.
Од обвинителството најавија дека во продолжението на постапката ќе бидат презентирани дополнителни материјални докази, меѓу кои и снимки од надзорни камери, за кои тврдат дека ќе ги потврдат наводите од обвинението.
Поради тоа што во дел од аудио-снимките има и приватни разговори, судот одлучи следното рочиште да се одржи без присуство на јавноста.
