Десет пожарникари од Територијалната противпожарна единица Струмица ноќеска интервенираа при пожар што избувнал на кровната конструкција на семејна куќа, при што со навремена реакција успеале да спречат поголема материјална штета и ширење на огнот.
Интервенцијата започнала околу 23:30 часот, кога била добиена пријава за пожар. На местото веднаш биле испратени три противпожарни возила и 10 пожарникари-спасители, кои започнале со гаснење на огнот.
Благодарение на брзата, координирана и професионална интервенција, пожарот бил ставен под контрола за кратко време. Пожарникарите успеале да спасат поголем дел од покривната конструкција и да спречат пламенот да се прошири кон останатиот дел од куќата, како и кон соседните објекти, со што била избегната уште поголема штета.
Од Територијалната противпожарна единица Струмица информираат дека интервенцијата завршила успешно и дека во пожарот нема повредени или човечки жртви.
Воедно, од единицата упатија благодарност до сите пожарникари-спасители кои учествувале во акцијата, истакнувајќи дека нивната професионалност, пожртвуваност и брза реакција биле клучни за успешно справување со пожарот и за спречување на посериозни последици.
