Косовска државјанка пријавила во полиција дека подолг временски период била изложена на психичко и физичко малтретирање од тетовец кој ја ангажирал да се грижи за неговата болна мајка, а при обид да го напушти работното место била физички нападната и тешко повредена.
Според информациите од СВР Тетово, на 14 јуни 2026 година околу 13 часот, во полициска станица се јавила Џ.М. (50) од Косово и пријавила дека била нападната од Г.Ј. од Тетово.
Во пријавата навела дека извесен период работела како негувателка и дека за тоа време била изложена на психички и физички притисоци. Според нејзините тврдења, кога работодавачот се посомневал дека сака да си замине, ја нападнал и ѝ нанел тешки телесни повреди.
Повредите биле констатирани во Клиничката болница во Тетово, каде што ѝ била укажана медицинска помош.
Од полицијата информираат дека поради нерегулиран престој во државата, жената била приведена во полициска станица, а потоа спроведена до Граничниот премин „Јажинце“.
Во меѓувреме, СВР Тетово презема мерки за пронаоѓање на пријавениот тетовец. По неговото пронаоѓање и целосно документирање на случајот, ќе следува соодветна пријава.
Надлежните институции продолжуваат да ги утврдуваат сите околности поврзани со настанот.
