Градоначалничката на Скопје, Данела Арсовска, доби 24-часовна полициска заштита по шокантниот напад што го претрпе во Чаир, додека вршела увид на дивоградба. Министерството за внатрешни работи соопшти дека две лица се кривично пријавени, од кои за едниот е побаран притвор, а за другиот мерки на претпазливост.
Според Обвинителството, првоосомничениот физички ја нападнал Арсовска, ја удирал со клоци и тупаници, а потоа и се заканувал дека ќе ја силува и ќе го ликвидира целото нејзино семејство. Второто лице продолжило со закани и по интервенцијата на МВР.
Арсовска беше примена во Ургентниот центар „8 Септември“ со видливи контузии, а по излегувањето од болница пред медиумите изјави:
„Пред очи на полицајци ме удираше и им викаше дека ќе ме убие. Објектот е дивоградба, краде струја и вода, а институциите не постапуваат – ниту за објектот, ниту за заканите.“
Таа посочи дека веќе има повеќе поднесоци за незаконски легализации до Обвинителството, а меѓу нив и пријава од 27 јуни против градоначалникот на Чаир, Висар Ганиу, за, како што тврди, криминални легализации на дивоградби.
Ганиу реагираше преку Фејсбук и изјави дека ниту еден функционер од Општина Чаир не бил вклучен во инцидентот, осудувајќи го насилството како „сериозно нарушување на демократските норми“.
Случајот предизвика остра реакција во јавноста. Хелсиншкиот комитет побара истрага за полициските службеници кои не го спречиле нападот, оценувајќи го случајот како „алармантен пример за насилство врз жени во јавниот живот“.
Од МВР информираа дека безбедносната проценка е изработена од АНБ и врз основа на неа е одобрена континуирана полициска заштита на Арсовска.
Премиерот Христијан Мицкоски повика институциите да постапат, но додаде:
„Многу работи се кажани. Не би имал што да додадам.“
Инцидентот се случил токму пред Полициската станица во Чаир, што дополнително ја зголемува јавната осуда за, како што се наведува, институционалната незаинтересираност за спречување и санкционирање на нападот врз избран градски функционер.
