Од полноќ, 15 јуни, официјално стапуваат во сила новите правила за користење на лентите на наплатните станици низ државата. Од Јавното претпријатие за државни патишта информираат дека лентите означени за М-Таг отсега ќе бидат наменети исклучиво за корисниците кои поседуваат електронски уред за наплата.
Со новите измени се укинува можноста на овие ленти да се врши наплата со М-Кард, па возачите кои ја користат оваа картичка ќе мора да избираат други ленти предвидени за нивниот начин на плаќање.
Од ЈПДП апелираат возачите навреме да ја следат сигнализацијата и информативните електронски табли поставени пред наплатните станици, со цел да се избегнат непотребни застои и метеж.
Лентите отсега ќе бидат поделени според начинот на плаќање: за М-Таг, за М-Кард, како и за плаќање со готовина и М-Кард. Надлежните потсетуваат и на значењето на светлосната сигнализација – зелената стрелка означува дека лентата е отворена за сообраќај, додека црвениот икс значи дека лентата не е во функција.
Од претпријатието предупредуваат дека непочитувањето на новата организација може да предизвика застои, да ја намали ефикасноста на наплатата и да влијае врз безбедноста на сообраќајот, па затоа ги повикуваат сите возачи внимателно да ги следат ознаките при пристигнување на патарините.
