Утре започнува учебната 2025-2026 година за вкупно 245.000 ученици – 177.800 основци и 67.200 средношколци. Наставата ќе трае до 10 јуни, освен за матурантите, чиј редовен распоред завршува на 15 мај. За првпат по седум години, учениците ќе добијат учебници по странски јазици, додека сите други учебници се обезбедени и над 90% од тиражот е веќе испорачан.
Министерката за образование Весна Јаневска истакна дека во повеќе училишта условите се подобрени, а инклузијата е подигната со ангажирање на 1.346 образовни асистенти во основното и, за првпат, 130 во средното образование. Учениците ќе се запознаат и со етичка примена на вештачката интелигенција во наставата, поддржани со сеопфатен прирачник за наставници и ученици.
Во новата учебна година започнува и примената на нов електронски дневник со подобрени перформанси, додека учениците на долготрајно болничко лекување ќе имаат формално образование преку онлајн или индивидуална настава. Наставниците ќе добијат ново зголемување на платите од 7,5 до 10 проценти, а талентираните ученици ќе имаат целосна поддршка за учество на меѓународни олимпијади и професионално кариерно насочување.
