Според изборот на посетителите, најубавиот божиќен пазар во Европа не се наоѓа во Франција, Германија или Австрија – иако ја носи нивната празнична естетика. Сместен е во срцето на Полска, во Вроцлав – град со богата историја, академска традиција и извонредна празнична атмосфера.
Вроцлав е познат како град на науката, дом на еден од најстарите универзитети во Европа, но и како место со повеќе мостови од Венеција. Чист, уреден и лесен за пешачка обиколка, градот плени со шарм во кој минатото и современоста се спојуваат на природен начин. Посебна атракција е фактот што уличните светилки сè уште рачно се палат – редок призор во денешна Европа.
Српска патувачка блогерка го опиша пазарот како „целосно празнично искуство завиткано во мирис на варено вино“, нагласувајќи дека главниот плоштад изгледа како сцена од бајка, опкружен со шарени историски фасади, светилки и огромна елка со украси во кои може и да се возите.
Бајковита атмосфера од ноември до јануари
Божиќниот базар во Вроцлав е еден од најпосетуваните настани во градот и секоја година привлекува илјадници туристи од Германија, Чешка, Украина, но и од цела Полска. За сезоната 2025/2026, пазарот е отворен од 21 ноември 2025 до 7 јануари 2026 година.
Лоциран е на главниот градски плоштад, кој во овој период е осветлен со илјадници светилки, украсен со импозантна елка и збогатен со атракции за деца и возрасни.
Работно време:
- секој ден од 10:00 до 21:00 часот
- затворен на 24 и 25 декември, како и на 1 јануари
- на 26 декември работи од 13:00 до 21:00 часот
- на 31 декември штандовите со сувенири се отворени до 17:00, а гастрономските до 02:00 по полноќ
Посетителите кои сакаат помирна прошетка и помалку гужви, се советуваат да го посетат базарот во текот на работната недела, бидејќи викендите се исклучително посетени.
Храна, пијалаци и локални вкусови
Божиќниот базар во Вроцлав е вистински гастрономски рај. Посебно се издвојува осципек – традиционално пушено сирење од планинските региони на Полска, најчесто послужено со брусница и уникатно за оваа земја.
Покрај него, посетителите можат да уживаат во:
- полски колбаси и бигос
- палачинки од компири
- печени костени
- чурос, лангос, помфрит
- разни слатки и празнични десерти
Греаното вино е неизбежен дел од искуството и доаѓа во неколку вкусови. Во 2025 година цената останува 20 злоти, а ист толку изнесува и депозитот за празничната шолја, која може да се врати на кој било официјален штанд. Плаќањето на базарот е исклучиво во готово.
За оние што не сакаат колекционерски шолји, греано вино во околните барови се нуди и по цена од 12 злоти.
Празнична дестинација со европски шарм
Со својата извонредна организација, автентична атмосфера и пристапни цени, божиќниот пазар во Вроцлав со право се вбројува меѓу најдобрите во Европа. Тој претставува идеална дестинација за декемвриско патување, празничен викенд или инспиративен влез во Новата година.
