Со правосилна судска одлука е утврдено дека Јани Бојаџи, во период додека ја извршувал функцијата директор, континуирано вршел психичко вознемирување врз свој вработен – извршниот продуцент Ненад Мирчевски.
Информацијата ја соопшти адвокатката Маја Ристова, која го застапуваше Мирчевски во судската постапка. Таа нагласи дека одлуката има особено значење за унапредување на заштитата на работничките права и достоинството на вработените.
„Оваа пресуда покажува дека поединецот, и покрај долготрајна и исцрпувачка правна битка, може да истрае и да добие правда. Гласот на жртвата има сила“, напиша Ристова.
Според деловите од пресудата кои се јавно достапни, судот утврдил дека Бојаџи со недолично, навредливо и негативно однесување создал непријателска работна средина, при што биле нарушени честа, угледот и човечкото достоинство на тужителот.
Судот ваквото однесување го квалификувал како мобинг – форма на психичко вознемирување на работното место, што е строго забранета согласно македонското законодавство.
Четиригодишна судска битка со повеќе пресврти
Судскиот спор започнал во февруари 2021 година, кога Мирчевски поднел тужба за мобинг преку својот правен застапник. Во текот на изминатите четири години, предметот поминал низ сложена судска процедура и повеќе одлуки:
- Основниот граѓански суд првично донел пресуда во корист на тужителот;
- Апелациониот суд ја укинал таа одлука и наложил повторно судење;
- По повторното судење, повторно била донесена пресуда во корист на Мирчевски;
- Подоцна, одлуката била преиначена во корист на Бојаџи;
- По ревизија до Врховниот суд, предметот бил вратен на повторно одлучување во Апелација, каде што со последната одлука конечно е ставен крај на постапката во корист на вработениот.
Правосилната пресуда се оценува како важен преседан, особено во медиумскиот сектор, каде случаите на мобинг ретко добиваат конечна институционална разрешница.
