Безбедносната служба на Украина (СБУ) соопшти дека извршила прецизен напад врз рускиот воен аеродром Белбек на Крим, при што биле уништени два борбени авиони Су-27.
Според официјалното соопштение објавено на Телеграм, нападот бил изведен со беспилотни летала со долг дострел, управувани од Центарот за специјални операции „Алфа“. Еден од авионите, како што наведува СБУ, се наоѓал на такси-патеката, целосно вооружен и подготвен за борбена мисија, кога бил погоден и целосно уништен.
Украинските служби проценуваат дека вкупната вредност на двата уништени авиони изнесува околу 70 милиони американски долари.
Во истиот напад, погодена била и контролната кула на аеродромот, што, според украинските извори, сериозно ја нарушува координацијата и контролата на воздушниот сообраќај во базата.
Ова е втор успешен удар на СБУ врз аеродромот Белбек во изминатите денови. Само неколку дена претходно, украинските беспилотни летала таму уништиле и значајна руска воена опрема, меѓу која два радара „Небо-СВУ“, радар од системот за противвоздушна одбрана С-400 „Триумф“, систем „Панцир-С2“, како и борбен авион МиГ-31 со полна муниција.
Од украинска страна се оценува дека овие напади значително ги ослабуваат руските воздушни и противвоздушни капацитети на Крим.
