Лековите за смирување и анксиолитиците не смеат да се издаваат без лекарски рецепт, предупредуваат здравствените институции, откако е забележан загрижувачки пораст на нивната употреба кај адолесцентите.
Според лекарите и фармацевтите, сè почесто млади лица посегнуваат по медикаменти за анксиозност, несоница и нервоза без соодветен медицински надзор, што може да доведе до сериозни здравствени последици, зависност и нарушувања во психофизичкиот развој.
Стручњаците посочуваат дека дел од овие лекови се набавуваат преку нелегални канали или со злоупотреба на рецепти, а во некои случаи и преку несоодветно издавање во аптеки, што претставува директно кршење на законската регулатива.
Психијатрите апелираат родителите да бидат внимателни на промените во однесувањето кај своите деца, како и да побараат стручна помош доколку забележат знаци на анксиозност, депресија или злоупотреба на лекови.
Од Министерството за здравство најавуваат засилени контроли и едукативни кампањи, со цел да се спречи нелегалната достапност на лекови за смирување и да се подигне свеста за нивната правилна и безбедна употреба.
