Туристите кои ова лето ќе го посетат Портофино, едно од најпознатите летувалишта на италијанската ривиера, ќе мора внимателно да ги почитуваат локалните правила, бидејќи за одредени прекршоци се предвидени високи парични казни.
Локалните власти веќе подолго време спроведуваат мерки за намалување на метежот во историското јадро на градот, а дел од нив се однесуваат на движењето и задржувањето на јавни површини.
Според важечката уредба, забрането е седење или лежење на улици, тротоари и плоштади, како и задржување на места каде што може да се попречи движењето на пешаците. Ограничувањата важат и за седење на ѕидови и други површини кои не се наменети за одмор на посетителите.
За прекршување на правилата може да бидат изречени казни од 25 до 500 евра, при што висината на казната зависи од конкретната ситуација и степенот на нарушување на јавниот ред.
Портофино е една од најпосетуваните туристички дестинации во Италија, а во текот на летната сезона неговите тесни улички и плоштади се преполни со посетители од целиот свет.
Општинските власти сметаат дека ваквите мерки се неопходни за да се овозможи непречено движење на туристите и да се зачува автентичниот изглед на старото градско јадро.
Посебен проблем, според нив, претставуваат поголемите групи туристи кои се задржуваат на прометни локации, создавајќи застои и дополнителен метеж во градот.
