Санае Такаичи вчера стана првата жена во историјата на Јапонија која ја води Владата, а покрај политиката, веднаш привлекува внимание и поради своите необични хобија. Позната како новата „железна дама“ на Јапонија, Такаичи е конзервативен политичар кој ја нагласува економската сила, одбранбената стабилност и културниот идентитет на земјата, но многумина зборуваат и за нејзините хеви-метал склоности.
Такаичи отворено признава дека е љубителка на „Ајрон Мејден“, „Дип Парпл“ и јапонскиот бенд „Икс Јапонија“. Од студентските денови свири тапани и гитара, а денес користи електронски тапани во својата парламентарна резиденција за опуштање и „ослободување од стрес“. Најомилена песна ѝ е „Burn“ од „Дип Парпл“, а на шега вели дека кога сопругот ја нервира, ги вади палките и свират додека тој спие.
Но музиката не е единствената нејзина страст. Такаичи е голем љубител на мотоцикли, возела „Кавасаки З400-ГП“ и е членка на Собранискиот мотоциклистички клуб. Покрај тоа, таа има црн појас во карате, иако не е познато дали и денес активно тренира.
Со вакви необични хобија и силни политички амбиции, новата премиерка веднаш стана една од најинтересните фигури на светската политичка сцена.
Не дознавај последен- читај ПРВ.мк
