Зоолошката градина во Прага презеде посебни мерки за да им помогне на животните полесно да ги издржат високите летни температури, користејќи големи количини мраз за нивно разладување за време на актуелниот топлотен бран во Европа.
Најголемо внимание привлекоа поларните мечки Алеут и Грегор, кои веднаш почнале да се тркалаат и да си играат во куповите ледени коцки поставени во нивниот простор. Според портпаролот на зоолошката градина Филип Машек, мразот не служи само за освежување, туку и за збогатување на нивната секојдневна средина и поттикнување на природното однесување.
Од зоолошката градина велат дека ваквата практика започнала пред две години како одговор на сè почестите топлотни бранови предизвикани од климатските промени. Освен поларните мечки, со мраз се разладуваат и видри, слонови и папагали, додека горилите добиваат ледени блокови во кои е замрзнато овошје.
Првичниот план бил мразот да се користи во текот на јули и август, но годинава високите температури пристигнале порано од очекуваното. На 28 јуни, Чешка регистрираше рекордни 41,9 степени Целзиусови.
„Времето постојано нè изненадува. Од ова извлековме поука и следната година ќе почнеме со обезбедување мраз уште порано“, изјави Машек.
