Според најновите податоци на Henley Passport Index, Сингапур повторно го држи првото место на листата на најмоќни пасоши во светот за 2026 година. Граѓаните на оваа азиска држава можат без виза да патуваат во дури 192 дестинации, што претставува највисок степен на глобална мобилност.
На спротивниот крај од листата е Авганистан, чиј пасош овозможува влез без виза во само 23 земји – разлика од речиси 170 дестинации во споредба со Сингапур.
Азија доминира на врвот: Јапонија, Јужна Кореја и Обединетите Арапски Емирати се на второто место со пристап до 187 земји. Европа останува силна – Норвешка и Швајцарија овозможуваат патување во 185 дестинации, додека просекот на ЕУ е околу 183.
Интересно е што и во рамките на ЕУ постојат разлики: од 177 дестинации за Бугарија и Романија, до 186 за Шведска.
Кога станува збор за Македонија, пасошот е рангиран на 38. место во светот, со можност за патување без претходна виза во околу 128 дестинации. Тоа вклучува целата Шенген-зона, Турција, Јапонија, Јужна Кореја и голем дел од Латинска Америка. Според индексот, Македонија е една од земјите што најмногу напредувале во последните 20 години – се искачила за 27 места во споредба со 2006 година.
На дното на листата остануваат земји како Авганистан, Сирија и Ирак, чијите граѓани се соочуваат со строги визни режими поради политичка нестабилност и миграциски притисок.
