Седум месеци по страшниот пожар во кочанската дискотека „Пулс“, каде што Мелиса Велинова беше тешко повредена, таа денес повторно може да се гордее со својата долга и убава коса. Ова не е само враќање на надворешниот изглед, туку симбол на надеж и нов почеток во нејзиниот живот.
На 16 март, во трагичната огнена стихија, Мелиса ја изгуби целата своја природна коса. Но, благодарение на хуманата иницијатива и неуморната грижа на познатиот фризер Зоки Давитков, таа доби надградба на косата која ѝ помогна да ја надмине оваа тешка фаза.
Во текот на изминатите месеци, Давитков постојано го следеше растењето на нејзината коса и сега, кога е доволно долга, ѝ направи екстензии, што ѝ донесе среќа и самодоверба кои сега зрачат од нејзиното лице.
„Пред само седум месеци оваа млада девојка имаше потреба од наша помош. Во пожарот во Кочани ја изгуби својата коса и доби перика преку нашата донаторска акција. Денес, по седум месеци, косата ѝ е доволно порасната за да направиме надградба. Ова не е само промена на фризурата, туку приказна за храброст, надеж и љубов кон себе. Секоја насмевка, секој поглед во огледалото, секој допир на косата е момент кој останува во срцето,“ напиша Давитков на Инстаграм, каде што ја сподели и реакцијата на Мелиса кога за првпат се погледна во огледало со новата фризура.
Овој гест на хуманост и поддршка уште еднаш покажува дека зад секоја трагедија може да се појави светлина кога општеството стои цврсто заедно со оние што најмногу имаат потреба од тоа.
Не дознавај последен - читај ПРВ.мк
