Рускиот претседател Владимир Путин упати сериозно предупредување до Соединетите Американски Држави, најавувајќи дека Русија ќе одговори со голема сила доколку се случи ракетен напад со „Томахавк“ на нејзина територија. Оваа изјава ја пренесоа руските државни медиуми, нагласувајќи дека реакцијата би била „зачудувачки силна“ и повикувајќи ги американските власти добро да размислат пред да преземат такви дејства.
Путин ја критикуваше идејата за испорака на вакви ракети во Киев, оценувајќи го тоа како обид за ескалација на конфликтот во регионот. Воедно, тој остро го осуди новиот пакет американски санкции кон Русија, нарекувајќи ги „непријателски чин“ кој нема да помогне во подобрување на односите меѓу двете земји.
Според Путин, новите санкции нема да имаат значително влијание врз економската стабилност на Русија. Тој изрази уверување дека руската енергетика е способна да се справи со предизвиците и потенцијалните загуби.
Путин, исто така, откри дека разговарал со американскиот претседател Доналд Трамп за влијанието што ситуацијата со руската нафта има врз глобалните цени, вклучувајќи ги и САД. Тој посочи дека ќе дојде до значително зголемување на цените на нафтата и нафтените производи, кои ќе се почувствуваат и на бензинските пумпи ширум светот.
„И САД не се исклучок. Во услови на внатрешно политички предизвици во САД, јасно е колку чувствителни ќе бидат овие процеси. Тие што ги наметнуваат ваквите мерки треба да сфатат за кого всушност работат“, изјави Путин.
Новиот пакет санкции, објавен вчера од страна на САД, се фокусира на најголемите руски нафтени компании, вклучувајќи ги „Роснефт“ и „Лукоил“, како и нивните подружници.
Не дознавај последен – читај ПРВ.мк
