Претседателот на Украина, Володимир Зеленски, категорично го отфрли концептот за отстапување дел од украинската територија на Русија како дел од било каква размена. Тој истакна дека „не е размена на територии ако заменуваш своја територија за своја територија“, нагласувајќи дека тоа не претставува праведен договор, туку само желба на некои страни.
„Не е размена кога заменуваш ништо за своја територија. Да се каже дека Русите нема да бараат дополнителна територија ако им дадете дел од вашата, тоа не е размена. Тоа е лудо“, изјави Зеленски, додавајќи дека ваквите обиди се неприфатливи за Украина.
Тој побара зголемување на меѓународниот притисок врз Русија и предложи замрзнатите руски средства да бидат пренасочени за поддршка на Украина, не само за хуманитарни цели, туку и за купување на европско и американско оружје за одбрана.
„Ние мораме да се одбраниме и да одговориме. Ако не сакаме да им дадеме шанса на Русите да победат, не смееме само да се браниме“, порача Зеленски.
Претседателот изрази благодарност кон европските лидери за нивната поддршка и ја истакна иницијативата на САД за набавка на американско оружје што ќе биде дадено на украинските вооружени сили.
На прашањето дали Европската Унија ќе понуди мировен план за Украина во наредните денови, Зеленски изјави дека не е запознат со таков конкретен план, но истакна дека Киев води разговори со своите партнери и пријатели за можни начини за постигнување мир.
„Не би сакал некој од некаде да донесе некаков план преку трета земја или Русија без наше учество“, нагласи тој.
Зеленски појасни дека за каков било мировен план прво треба да има прекин на огнот и Русија да покаже подготвеност за преговори.
„Русија засега не покажува желба да ја запре војната. Но, ако се зголеми притисокот, тогаш ќе седнат да преговараат. Тоа е вистинскиот пат“, додаде украинскиот претседател.
Не дознавај последен – читај ПРВ.мк
