Во следните неколку години, светот на парите ќе се промени радикално. Некои национални валути ќе исчезнат или ќе бидат заменети – како што е случајот со бугарскиот лев, кој официјално ќе замине во историјата со воведувањето на еврото на 1 јануари 2026 година.
Покрај тоа, некои региони ќе се обединат и ќе користат заеднички валути, како што е проектот „Еко“ во Западна Африка. Но, најголемата промена ќе ја донесат дигиталните валути на централните банки (CBDC), кои нема да го укинат парите, туку целосно ќе го променат начинот на кој ги користиме.
Преседани и аларми за другите земји
Воведеното евро во Бугарија го отвори патот за проширување на Еврозоната, што создава притисок врз земји како Шведска, Полска и Унгарија да размислат за сличен чекор до 2030 година.
Кога валутата исчезнува поради криза: примерот Зимбабве
Случајот со Зимбабве е најјасен доказ како губењето на довербата и хиперинфлацијата може да доведат до целосно укинување на валута. Во 2024 година, Зимбабве го замени својот долар со нова валута – ZiG, делумно поддржана со злато и девизни резерви. Иако ова е ризичен и нестабилен модел, покажува колку брзо може да се промени валутниот систем во екстремни услови.
Дедоларизација не значи укинување на доларот
Многу се зборува и за намалување на зависноста од доларот во светската трговија, но нема никакви сигнали дека доларот ќе биде укинат. Напротив, улогата на американската валута останува неприкосновена поради стабилноста, ликвидноста и довербата во американскиот финансиски пазар.
