Во швајцарските Алпи постои хотел што нуди најбогато искуство со... речиси ништо. Без ѕидови, без покрив и без бања, но со милион ѕвезди над главата, „Нул Штерн“ (нула ѕвезди) ги освојува авантуристите од целиот свет. Спиењето под отворено небо стана врв на луксузниот минимализам – и чини околу 350 евра по ноќ.
Сместен во близина на селото Сајон, хотелот нуди четири уникатни „соби“ – кревет, ламби и поглед што не се опишува. Некои се опкружени со лозја, други со средновековни кули, а најпровокативната е буквално покрај бензинска пумпа – уметничка порака за тишината што ја губиме.
Создаден од швајцарски уметници, овој концепт не нуди удобност, туку доживување. Дожд? Ќе ве преместат бесплатно во традиционален хотел. Појадок? Органски, локален и вклучен. Бања? Пет минути пешачење.
„Нул Штерн“ не е за секого – но ако сакате незаборавна ноќ под ѕвезди и поглед што вреди повеќе од сите ѕидови, ова е вашето место.
