Amazon објави неверојатна бројка – повеќе од 1 милион активни роботи работат во нивните магацини ширум светот. Овие интелигентни машини сѐ повеќе ја заменуваат човечката работна сила, а според податоците, 75% од сите испораки веќе се извршуваат со помош на роботи.
Иако компанијата вработува околу 1,56 милиони луѓе, растот на автоматизацијата е толку брз што човечката работна сила полека станува малцинство. Новата генерација роботи, како моделот Vulcan, користи напредни сензори за допир и прецизност, додека постарите модели Hercules, Pegasus и Proteus со неверојатна ефикасност ги преместуваат производите и се движат самостојно меѓу вработените.
Благодарение на вештачката интелигенција и DeepFleet системот, Amazon успеа да ја намали цената по испорака и истовремено да ја зголеми ефикасноста – испораките по работник се зголемиле за 22 пати во споредба со периодот пред автоматизацијата.
Иако роботите ги преземаат рутинските задачи, компанијата тврди дека луѓето и понатаму се клучни – но сега главно во технички, инженерски и управувачки позиции. Над 700.000 работници веќе добиле обука за работа со роботи, а бројот на нови технички позиции се зголемува, особено во напредно автоматизираните центри.
Но, не сè е идеално. Зголемената автоматизација предизвикува загриженост кај синдикатите и активистите, кои предупредуваат дека многу работници ќе останат без работа, особено во земјите каде што Amazon отвора целосно роботизирани магацини. Некои извештаи посочуваат и на зголемена стапка на повреди во автоматизираните центри – 7,9 повреди на 100 работници, во споредба со 5,9 во неавтоматизираните.
Од Amazon ги негираат овие тврдења, со објаснување дека роботите го олеснуваат физичкиот напор и го зголемуваат безбедносниот стандард.
Со вакво темпо, иднината на трудот во Amazon можеби ќе изгледа сосема поинаку – машините работат, а луѓето ги набљудуваат.
