Принцезата од Велс, Кејт Мидлтон, испрати силна и емотивна порака до јавноста со објавувањето на личен есеј, кој следува по нејзиното прво официјално патување во странство откако ја заврши борбата со ракот.
За време на дводневната посета на Северна Италија, Кејт се запозна со тамошните пристапи за рано детско образование, а своите впечатоци ги преточи во есеј со наслов „Создавање услови за љубовта да цвета преку природата и креативноста“.
Во текстот таа предупредува дека современиот, сè подигитализиран начин на живот ги оддалечува луѓето едни од други и ја истакнува важноста на вистинската човечка поврзаност.
„Децата секогаш ми даваат надеж. Нивната љубопитност, искреност и способност да се радуваат на малите нешта нè потсетуваат на најдоброто во човештвото“, напиша Кејт.
На прашањето што е најважното нешто што родителите можат да го направат за своите деца, нејзиниот одговор бил едноставен: „Да ѝ дадеме приоритет на љубовта.“ Притоа, таа објаснува дека мисли на безусловна љубов, трпение и секојдневна грижа, а не на големи гестови.
Паралелно со есејот, Кралската фондација објави нови фотографии од принцезата, на кои таа е насмеана и во друштво на деца. Според извори блиски до палатата, ова патување означува почеток на нејзиното постепено враќање на јавните обврски.
Принцот Вилијам неодамна откри дека Кејт повторно е полна со енергија, но дека семејството внимателно го планира нејзиниот распоред за да има доволно време за одмор и закрепнување.
И покрај предизвиците низ кои помина, Кејт Мидлтон останува една од најомилените членови на британското кралско семејство, а нејзината порака за љубовта, семејството и децата предизвика позитивни реакции ширум светот.
