Церемонијата на доделувањето на наградите на престижното списание „WSJ Magazine“ се претвори во вистински медиумски спектакл, откако Били Ајлиш (23) со едно едноставно, но директно прашање предизвика најнезгоден момент во годината – токму пред очите на еден од најбогатите луѓе на планетата, Марк Закерберг.
Откако ја доби наградата за музички иноватор на годината, младата пејачка одлучи својот говор да го претвори во апел кон светската елита што седи во првите редови. „Ве сакам сите, но овде има луѓе кои имаат многу повеќе пари од мене. Ако сте милијардер — зошто сте милијардер? Без навреда, но дајте ги вашите пари,“ рече Ајлиш, оставајќи ја салата во мешавина од аплауз и тивка, непријатна тишина.
Камерите моментално се насочија кон Марк Закерберг, чиј израз на лицето стана вирален за само неколку минути. Според присутните, основачот на „Фејсбук“ останал неподвижен, не се насмеал, ниту аплаудирал. Неговата реакција беше толку студена што корисниците на социјалните мрежи веднаш ја нарекоа „моментот кога времето застана“.
Иронијата на ситуацијата беше уште поголема затоа што неколку минути претходно, сопругата на Закерберг, Присила Чен, ја доби наградата за „Филантроп на годината“ за нејзината работа со организацијата „Chan Zuckerberg Initiative“. Иако двојката одамна вети дека ќе донира 99% од своите акции во „Мета“, очигледно директниот повик на Били Ајлиш бил премногу непријатен дури и за милијардерот кој зборува за хуманост.
Она што најмногу ја засили пораката на младата пејачка е фактот што таа самата практикува тоа што го зборува. Водителот на вечерта, Стивен Колбер, откри дека Били донирала 11,5 милиони долари од нејзината последна турнеја „Hit Me Hard and Soft“ за климатска правда и хуманитарни проекти за храна. Ова откритие предизвика втор, уште погласен стоечки аплауз и ја претвори вечерта во симболичен судир меѓу две генерации и два света – оној што создава промени и оној што ги поседува парите.
На крајот, сцената остана запаметена не само по наградите, туку по тоа како едно едноставно прашање – „Зошто си милијардер?“ – го „замрзна“ еден од најмоќните луѓе во светот. И можеби токму тој миг најдобро ја прикажа разликата меѓу идеализмот на младите и прагматизмот на богатите.
Не дознавај последен- читај ПРВ.мк
