Научниците открија огромна подледничка структура под Источен Антарктик, составена од околу 30 меѓусебно поврзани базени кои се шират како лепеза од подрачје во близина на Јужниот Пол кон крајбрежјето.
Откритието го направил тим предводен од геофизичарот Егидио Армадило од Универзитетот во Џенова, а структурата е наречена Источноантарктичка лепезаста басенска провинција (EAFBP).
Според истражувачите, оваа геолошка формација најверојатно потекнува од периодот пред распадот на древниот суперконтинент Гондвана и можеби одиграла важна улога во одвојувањето на Антарктикот од Австралија.
До откритието се дошло со комбинирање на радарски, сеизмички, магнетни и гравитациски податоци, при што научниците забележале дека базените не се распоредени случајно, туку потекнуваат од заедничка централна точка.
Освен што нуди нови сознанија за геолошката историја на Земјата, структурата е важна и за проучување на движењето на антарктичкиот мраз. Познавањето на релјефот под ледениот покривач им овозможува на научниците попрецизно да предвидат како ќе се однесува мразот во иднина и какво влијание би можеле да имаат климатските промени.
Иако откритието отвора нови перспективи за разбирање на Антарктикот, научниците нагласуваат дека се потребни дополнителни истражувања за да се утврди кога точно настанала структурата и колку силно влијае врз денешните геолошки и климатски процеси.
