Индиските власти донесоа одлука привремено да ја ограничат употребата на апликацијата Телеграм, поради сомнежи дека платформата била користена за организирање мрежи за препишување и измами поврзани со приемните испити за медицински факултети.
Мерката доаѓа непосредно пред повторното полагање на Националниот тест за квалификација и прием, закажано за 21 јуни. Испитот претходно беше поништен поради сериозни сомнежи дека дел од прашањата биле објавени пред официјалниот почеток на тестирањето.
Од Националната агенција за тестирање соопштија дека преку Телеграм функционирале организирани групи и канали кои на кандидатите им нуделе нелегален пристап до испитни материјали и услуги за измама.
Во испитниот процес учествуваат повеќе од два милиони кандидати ширум Индија, а скандалот предизвика силни реакции во јавноста и масовни протести. Граѓаните бараат одговорност за пропустите и поголема заштита на интегритетот на образовниот систем.
Според надлежните институции, во соработка со сајбер-криминалните служби биле затворени голем број Телеграм групи, канали и ботови кои нуделе сомнителни услуги поврзани со испитите.
Иако мерката е насочена кон спречување на злоупотребите, властите признаваат дека таа ќе влијае и врз голем број корисници кои Телеграм го користат за легитимни образовни, деловни и приватни потреби.
Телеграм засега нема официјален коментар за одлуката на индиските власти.
