Компанијата Google Earth воведе нова можност која им овозможува на корисниците бесплатно да летаат виртуелно над целиот свет директно преку интернет-прелистувач.
По речиси две децении, симулаторот за летање кој досега беше достапен само преку десктоп верзијата на Google Earth, сега може да се користи и преку веб-прелистувач без потреба од дополнителна инсталација.
Оваа функција првпат беше претставена во 2007 година како скриена опција во Google Earth, а сега е достапна за сите корисници преку модерните прелистувачи како Chrome и Safari.
За да се активира симулаторот, потребно е да се отвори Google Earth, да се избере опцијата „Explore“, потоа „Tools“, а потоа и „Flight Simulator“. Управувањето се врши преку стрелките на тастатурата, додека брзината може да се контролира со дополнителните алатки на екранот.
Од Google велат дека функцијата е наменета пред сè за забава и истражување, но истовремено покажува колку напредувале веб-апликациите, кои денес можат да понудат искуства што порано беа возможни само преку специјализирани десктоп програми.
Новата алатка им овозможува на корисниците да ги разгледуваат градовите, планините, океаните и познатите знаменитости од сосема поинаква перспектива, создавајќи чувство како навистина да управуваат со авион над планетата.
