Министерот за култура Зоран Љутков заедно со премиерот Христијан Мицкоски денес присуствуваше на свеченото отворање на „Македонскиот фолклорен фестивал Преспа“, кој се одржа во Пустец, Албанија – место каде што пулсира срцето на македонската заедница надвор од татковината.
Посетата започна со обиколка на црквата „Св. Архангел Михаил“, каде министерот и премиерот со свеќа и молитва оддадоа духовна почит, симболично нагласувајќи ја важноста на верските и културните корени на нашиот народ.
На плоштадот „Гоце Делчев“ беа пречекани со искрени зборови на благодарност од градоначалникот Пали Колевски и претставници на локалната македонска заедница, меѓу кои и Едмонд Темелко. Настанот продолжи со настап на актерот Петар Темелковски, кој преку монодрама долови длабоки национални емоции, како и со изведби на македонски фолклорни групи облечени во традиционални носии од сите краишта на Македонија.
„Овој ден не беше само културен настан, туку израз на љубов, истрајност и национално достоинство. Јазикот, верата и традицијата се она што не обединува – и покрај сите граници,“ истакна министерот Љутков во својата објава.
Со оваа посета, Министерството за култура уште еднаш потврдува дека Македонците надвор од државата не се заборавени. Напротив – тие се важен дел од нашето национално ткиво и силата што го чува македонскиот идентитет и надвор од границите.
