Земјите членки на Г7 договорија заедничка интервенција на енергетскиот пазар со пуштање до 100 милиони барели сурова нафта и дизел од своите стратешки резерви во следните четири месеци.
Францускиот претседател Емануел Макрон по видеосостанокот на лидерите на Г7 соопшти дека целта на мерката е да се намали притисокот врз пазарот и да се влијае врз високите цени на горивата.
Акцијата ќе се спроведува во координација со Меѓународната агенција за енергија, а дел од договорот предвидува земјите членки да не воведуваат ограничувања или забрани за меѓусебен извоз на енергенси.
Според најавите, значителни количества дизел треба да бидат пуштени на пазарот уште во првите 20 дена од спроведувањето на мерката.
Макрон истакна дека и американскиот претседател Доналд Трамп дал јасна поддршка за непречен извоз меѓу партнерите, иако претходно се споменуваа можности за ограничување на американскиот извоз на гас.
Францускиот претседател очекува преземените чекори да придонесат за намалување на цените на горивата.
Лидерите на Г7 истовремено упатија повик и до другите големи производители на енергенси да не воведуваат извозни блокади кои би можеле дополнително да ја влошат состојбата на глобалниот пазар.
Дополнително, земјите ќе се координираат и околу планираните ремонти и одржување на рафинериите, со цел да се избегне истовремено запирање на поголем број производствени капацитети.
Претседателот на Европскиот совет, Антонио Кошта, ги поздрави договорените мерки и најави дека енергетската состојба ќе биде една од главните теми на самитот на Европската Унија на 15 и 16 октомври.
Според Кошта, актуелните случувања повторно ја покажуваат потребата Европа постепено да ја намалува зависноста од фосилни горива и да го забрза развојот на сопствени извори на енергија.
