Директорот на Фондот за здравствено осигурување, Златко Перински, појаснува дека предложените измени во правилата за боледување не предвидуваат скратување на правото на боледување. Според него, промената се однесува на моментот од кога ќе почнат да се применуваат дополнителните медицински критериуми за негово продолжување.
Во интервју за „Република“, Перински посочува дека критериумите би се применувале по петтиот, наместо по седмиот ден од боледувањето.
Матичните лекари и понатаму би го задржале правото да утврдат привремена спреченост за работа до 15 дена, додека за боледување подолго од овој период одлуката останува во надлежност на лекарска комисија.
Според Перински, дополнителна дијагностика нема да биде задолжителна за секоја дијагноза. Тој објаснува дека намерата е евентуалните посериозни здравствени состојби да се откриваат порано, а не пациентите побрзо да се враќаат на работните места.
Предложените измени предвидуваат и дигитализација на дел од постапката, односно воведување електронски ПСР-образец за боледувањата подолги од 15 дена.
Предвидено е и олеснување за тешко болните и неподвижните лица, како и за пациентите кои се на болничко лекување. Во одредени случаи боледувањето би можело да се утврди без нивно физичко присуство.
Во однос на теренските контроли, Перински нагласува дека пациентите нема да имаат обврска постојано да престојуваат дома. Начинот на контрола би зависел од здравствената состојба и препораките на лекарот.
Измените сè уште не се усвоени. Управниот одбор на ФЗО не ги прифатил на последната седница, а се очекува тие повторно да бидат разгледани во вторник.
Перински посочува дека Фондот останува отворен за предлози и забелешки од лекарите и синдикатите пред да биде утврдено конечното решение.
