Смртта на 27-годишната финска инфлуенсерка Оливија Орас повторно го привлече вниманието на јавноста, додека полицијата ги истражува околностите под кои младата жена починала неколку дена по посетата на приватна клиника за естетска хирургија во Хелсинки.
Орас на 31 август пристигнала во „Plastic Surgery Center“, каде требало да ѝ биде направена липосукција. Според информациите што ги објави финскиот јавен сервис Yle, таа изгубила свест додека примала анестезија, пред воопшто да започне планираната интервенција.
Нејзината здравствена состојба нагло се влошила, по што била префрлена во болница. Три дена подоцна, на 3 септември, Орас починала.
Нејзините родители поднеле кривична пријава, а полицијата во Хелсинки го истражува случајот поради сомнение за предизвикување смрт од тешка небрежност. Според досега објавените информации, се испитува постапувањето на еден или повеќе лекари, но во оваа фаза не е утврдена кривична одговорност ниту е докажано дека постапките во клиниката директно ја предизвикале смртта.
По случајот била извршена ненајавена контрола во клиниката, а нејзината работа потоа била суспендирана поради загриженост поврзана со безбедноста на пациентите.
Yle објави и наводи од поранешни вработени според кои уште во 2023 година постоеле проблеми со хигиенските практики во установата. Меѓу другото, било тврдено дека дел од опремата наменета за еднократна употреба била миена и повторно користена. Подоцнежните инспекции, според истиот извор, утврдиле недостатоци поврзани со хигиената, стерилизацијата, спречувањето инфекции и ракувањето со медицинска опрема.
Оливија Орас била позната во Финска преку социјалните мрежи уште од тинејџерските години, а се појавила и во документарниот филм „The Perfect Selfie“.
Истрагата продолжува и треба да утврди што точно се случило во клиниката и дали постои одговорност за смртта на 27-годишната девојка.
