Најмалку 21 лице загина во тешка сообраќајна несреќа во Јужна Африка, во која учествувале два минибуса-такси и теренско возило.
Несреќата се случила во неделата навечер во покраината Западен Кејп, меѓу градовите Принц Алберт и Лиу-Гамка, на околу 380 километри источно од Кејптаун.
Според првичните информации од надлежните служби, две минибус-такси возила најпрво се судриле челно, по што во нив удрило теренско возило. Точните околности што довеле до несреќата се предмет на истрага.
Три лица биле итно пренесени во болница, но подоцна биле прогласени за починати, соопшти полицијата.
Корпорацијата за управување со патниот сообраќај предупреди дека бројот на жртвите може дополнително да се промени додека екипите на итните служби и властите продолжуваат со работа и истрага на местото на трагедијата.
Поради несреќата, автопатот Н1 бил затворен во делот каде што се случил судирот.
Минибусите-такси се еден од главните облици на јавен превоз за милиони жители на Јужна Африка. Земјата и претходно годинава се соочи со тешки несреќи со вакви возила – во две одделни сообраќајки во јануари загинаа најмалку 25 лица, меѓу кои и 14 деца.
