На жителот на кумановското село Черкези, осомничен дека преку социјалните мрежи упатил закани кон премиерот Христијан Мицкоски, му е определена мерка притвор во траење од осум дена.
Од СВР Куманово информираа дека Отсекот за компјутерски криминал, во координација со Секторот за компјутерски криминал и Одделот за криминалистичка полиција при БЈБ, по брза постапка поднел кривична пријава против А.Д.
Тој е осомничен за кривично дело „Загрозување на сигурноста“ по член 144 став 5 од Кривичниот законик.
Според пријавата, на 11 септември осомничениот оставил коментар со заканувачка содржина под објава на профилот на премиерот на социјална мрежа.
По предлог на надлежните органи, судија на претходна постапка му определил притвор во траење од осум дена.
Мицкоски претходно изјави дека за заканите дознал еден ден порано и откри дел од нивната наводна содржина.
„И јас вчера дознав за тие закани, дека сум бил свиња и дека ќе ме колел на плоштад, и упатил пцовки кон мене и моето семејство“, рече премиерот.
Случајот останува во надлежност на институциите, а кривичната одговорност на осомничениот треба да биде утврдена во понатамошната постапка.
