Потресни сведоштва денеска беа изнесени пред Основниот суд во Куманово, каде продолжи судењето против Трајко Бојковски, обвинет за четири убиства и два обиди за убиство на жени.
На второто рочиште сведочеа Росанка Трајковска и Слободка Арсовска од селото Челопек, двете на возраст над 80 години, кои пред судот се присетија на нападите што, според нивните искази, ги преживеале.
Трајковска, родена во 1939 година, сведочеше дека обвинетиот околу еден час ја тепал и ја допирал по телото. Пред судот прашала зошто била нападната и зошто, според нејзиното сведоштво, обвинетиот се обидел да ја силува.
Арсовска, родена во 1943 година, раскажа дека го забележала обвинетиот во ходникот од својот дом откако станала во текот на ноќта. Таа тврди дека тој не одговорил на нејзините прашања, туку ја нападнал и почнал да ја дави.
Во еден момент повикала по својот син. Според нејзиниот исказ, Бојковски помислил дека тој се наоѓа во куќата, по што ја пуштил и избегал. Жената сведочеше дека останала без воздух, изгубила свест и подоцна се разбудила на подот.
На рочиштето обвинетиот имал и нов бранител по службена должност, адвокатот Тони Цветковски. Одбраната побара пред судот да бидат сослушани психијатрите и психолозите кои го изготвиле вештачењето, особено поради проценката дека постои висок ризик од повторување на кривични дела.
Цветковски побара да се разгледа и можноста за изрекување мерка за безбедност доколку се исполнети законските услови, како и самиот обвинет да даде исказ за околностите наведени во обвинението.
Јавниот обвинител Владимир Лапе се спротивставил на дел од предлозите од процесни причини, но немал забелешка вештите лица да бидат сослушани. Според него, досегашното вештачење е јасно во однос на пресметливоста на обвинетиот.
Лапе оцени и дека денешните сведоштва на преживеаните жртви суштински не се разликувале од исказите што претходно ги дале во обвинителството.
На следното рочиште, закажано во септември, се очекува да бидат сослушани тројцата вештаци за дополнително образложување на нивниот наод и мислење, а предвидено е исказ да даде и обвинетиот.
Бојковски се товари за четири убиства и два обиди за убиство на жени. Постапката е во тек и за обвиненијата сè уште нема правосилна судска пресуда.
