Американскиот претседател Доналд Трамп остро ги нападна противниците на изградбата на огромни дата центри во САД, во време кога вештачката интелигенција и инфраструктурата потребна за нејзиниот развој стануваат сè позначајно политичко и економско прашање.
Трамп преку „Трут соушл“ порача дека американските заедници кои се спротивставуваат на изградбата на вакви објекти го прават тоа доколку сакаат да останат „заостанати и сиромашни“.
Притоа ја спомена и Кина, главниот американски конкурент во глобалната трка за развој на вештачката интелигенција.
„Кина не може да биде посреќна поради ова движење против дата центрите“, порача Трамп.
Отпорот кон изградбата на големи дата центри во САД во последниот период расте. Дел од локалните заедници изразуваат загриженост поради огромната потрошувачка на електрична енергија, потребите за вода, влијанието врз животната средина и можните последици врз локалната инфраструктура.
Трамп, од друга страна, ги истакнува економските придобивки. Според него, ваквите инвестиции можат да донесат нови работни места, економски раст и поволности за регионите во кои се градат.
Прашањето добива дополнителна политичка тежина пред изборите во САД, каде што во повеќе сојузни држави се водат дебати за тоа дали економската корист од огромните технолошки инвестиции ги надминува трошоците за локалните заедници.
Во меѓувреме, технолошките гиганти вложуваат огромни средства во инфраструктурата потребна за развој на вештачката интелигенција. Amazon, Google, Microsoft и Meta, заедно со компании од индустријата за чипови како Nvidia, инвестираат стотици милијарди долари во нови капацитети и компјутерска инфраструктура.
Дата центрите стануваат еден од клучните елементи во глобалната трка за вештачка интелигенција, но истовремено отвораат сè поголема дебата околу нивната потрошувачка на струја и вода, влијанието врз локалните цени и реалниот број долгорочни работни места што ги создаваат.
