Во германскиот град Улм се случила трагедија што го потресе целиот регион – татко, во обид да го паркира својот автомобил марка БМВ, несвесно го прегазил своето бебе кое било во детско седиште оставено зад возилото.
Според информациите на германскиот медиум „Билд“, несреќата се случила кога таткото, верувајќи дека веќе го ставил седиштето со бебето во автомобилот, тргнал наназад без да провери. Детското седиште, кое најверојатно било поставено на земја токму зад автомобилот, било прегазено во движењето наназад.
Екипата на брза помош пристигнала веднаш на местото на несреќата и се обидела да го реанимира бебето, но за жал безуспешно. Смртта на детето била потврдена на самото место.
Полицијата и обвинителството отворија истрага за да ги утврдат сите околности под кои дошло до овој трагичен инцидент. Во интерес на приватноста на семејството, властите не откриваат детали – не се соопштува кој го оставил седиштето зад автомобилот, ниту полот на бебето.
Не е познато дали таткото е приведен или дали ќе се соочи со кривична одговорност. Истрагата продолжува, а јавноста е оставена во шок поради оваа ненамерна, но страшна грешка што завршила со ненадоместлива загуба.
