41-годишна француска државјанка починала на грчкиот остров Крит откако ѝ се слошило додека пешачела во услови на исклучително високи температури. Трагичниот настан се случил во близина на Балос, во областа Ханија.
Според информациите објавени од Euronews, жената заедно со својот партнер се упатиле кон плажата Балос, иако временските услови биле исклучително тешки, а патеката по која тргнале била долга и напорна.
Двојката го оставила автомобилот на паркинг во Фаласарна, по што продолжила пеш. Тие избрале патека која на теренот била означена со предупредувања за забранет пристап. Станувало збор за траса со тежок терен, која дополнително го зголемила физичкиот напор во услови на високи температури.
На враќањето од Балос, кога биле на околу еден километар од паркингот, 41-годишната Французинка ненадејно се онесвестила. Според првичните информации, причината била тешка дехидратација предизвикана од изложеноста на екстремната топлина и физичкиот напор.
Нејзиниот партнер веднаш реагирал и се вратил кон автомобилот за да земе вода, а истовремено се јавил на телефонскиот број 112 и побарал итна помош.
По добиениот повик, била активирана спасувачка операција. Во акцијата учествувале пожарникари од станицата Кисамос и специјализираниот тим EMODE.
Спасувачите ја пронашле жената во бессознание и веднаш започнале со укажување помош и реанимација.
Подоцна во спасувачката акција се вклучил и тимот на Националниот центар за итни случаи, EKAB. Медицинските екипи продолжиле со обидите за реанимација и за време на транспортот кон болницата.
И покрај сите преземени напори, надлежните служби потврдиле дека жената починала за време на транспортот до болницата.
Трагичниот случај повторно ги актуелизира предупредувањата на грчките служби за опасностите од пешачење и планинарење во услови на екстремна топлина.
Координативниот центар на Грчката противпожарна служба предупредува дека долгите и физички напорни патеки можат да претставуваат сериозен ризик кога температурите се многу високи и кога луѓето се изложени на директно сонце.
Од службите посочуваат дека високите температури значително го оптоваруваат организмот, особено при подолг физички напор, и ги повикуваат туристите и локалното население да бидат особено внимателни.
Надлежните апелираат сите кои планираат пешачење или планинарење во вакви временски услови внимателно да ги следат официјалните предупредувања, да избегнуваат опасни и затворени патеки и да не го потценуваат влијанието на високите температури врз организмот.
