Двајца пилоти го загубија животот во пад на едномоторен авион во областа Контариотиса, во грчкиот регион Пиерија, во неделата, на 19 октомври. Причините за несреќата засега остануваат непознати, а истражителите проверуваат дали падот бил предизвикан од технички дефект или човечка грешка.
Според првичните информации, пилотот се обидувал да слета на пистата на аероклубот во Контариотиса кога авионот ненадејно ја изгубил висината и се урнал.
Членови на аероклубот, кои разговарале со еден од пилотите само неколку секунди пред несреќата, изјавиле дека непосредно пред падот немало никакви индикации за технички проблеми. Како што објави грчката телевизија АНТ1, летот се одвивал нормално, а до моментот на несреќата не бил пријавен никаков дефект.
Претходно авионот извршил низок прелет, по што повторно се издигнал за да направи свртување и да се порамни со пистата. Падот се случил во завршната фаза од маневрот за слетување, кога леталото ненадејно ја изгубило висината.
Полицијата веќе презела дел од истражните дејствија, а се очекуваат и резултатите од Комисијата за истрага на воздухопловни несреќи. Нејзините наоди треба да помогнат во утврдувањето на околностите под кои се случил падот.
Засега нема конечен одговор што довело до губењето на висината и уривањето на авионот, а истрагата треба да утврди дали станува збор за технички проблем, човечка грешка или друга причина.
