Над пет тони небезбедна храна биле запленети и уништени минатата недела за време на вонредните инспекциски контроли на скопските пазари. Од Агенцијата за храна и ветеринарство (АХВ) најавуваат дека засилените проверки против нелегалната продажба на овошје и зеленчук ќе продолжат и во наредниот период.
Акциите биле спроведени на Зелен пазар и на пазарот во скопската населба Ѓорче Петров. Таму инспекторите затекнале продажба на храна надвор од организираните пазарни простори.
„Минатата недела, во рамки на акциите спроведени на скопскиот Зелен пазар и на пазарот во населбата Ѓорче Петров, запленети и уништени се над 5 тони небезбедна храна“, соопштија од АХВ.
Според информациите на Агенцијата, најголемиот дел од запленетите производи биле овошје и зеленчук што се продавале нелегално, надвор од предвидените пазарни простори.
„Станува збор главно за овошје и зеленчук кои нелегално се продавале, надвор од пазарот“, се наведува во соопштението.
Од АХВ објаснуваат дека засилените инспекциски контроли имаат цел да ја спречат продажбата на храна за која нема соодветни информации за потеклото, како и на производи што се продаваат во несоодветни услови. Посебно внимание се посветува на препродавачите кои ја вршат својата дејност надвор од организираните пазари.
Контролите се реализираат во координација со комуналната инспекција на Град Скопје, Министерството за внатрешни работи и Државниот пазарен инспекторат.
Надлежните најавуваат дека акциите нема да завршат со проверките на Зелен пазар и во Ѓорче Петров, туку ќе бидат опфатени и други продажни локации во земјата.
„Агенцијата за храна и ветеринарство ќе продолжи со спроведување на засилените контроли и во наредниот период, на различни локации во Скопје и низ државата“, се наведува во соопштението.
