Најмалку 20 македонски државјани, главно млади на возраст од 18 до 25 години, се поврзани со криминални активности во Србија или Црна Гора. Ова го објави емисијата „КОД“, повикувајќи се на податоци до кои дошла редакцијата во рамките на своето истражување.
Според сознанијата презентирани во емисијата, регрутирањето на младите често започнува со понуди што им изгледаат привлечно – пари, обезбедено сместување и чувство дека припаѓаат на одредена група. Но, како што се наведува, по првичното привлекување, од нив се бара да извршуваат сè посериозни задачи.
Активностите, според истражувањето, може да започнат со палење автомобили, а потоа да преминат во транспорт на дрога и учество во насилни напади.
„КОД“ открива и дека во дел од случаите на регрутираните млади им биле одземани пасошите, додека истовремено им биле обезбедувани лажни документи. Со нивното навлегување во криминалните активности, напуштањето на таквата средина станувало сè потешко.
Последиците од ваквото поврзување со криминални групи веќе се сериозни. Емисијата посочува дека еден млад Македонец го загубил животот во Белград, додека други двајца се наоѓаат во притвор во Србија и Црна Гора.
Соговорничките од академската заедница предупредуваат дека криминалните групи ја искористуваат ранливоста на младите, нивната потреба да бидат прифатени и желбата да обезбедат материјална сигурност. Токму овие околности можат да ги направат подложни на понуди што на почетокот изгледаат како можност за подобар живот, а подоцна ги вовлекуваат во сериозни кривични дела.
Според нив, за навремено препознавање и спречување на ваквите ризици неопходна е заедничка реакција на семејствата, училиштата и социјалните служби. Раното забележување на предупредувачките знаци и соодветната поддршка за младите се посочуваат како важни чекори во спречувањето на нивното вовлекување во криминални мрежи.
