Бугарскиот оперски пејач Николај Иванов почина, а веста за неговата смрт ја потврдија неговите пријатели. Неговото семејство се соочува со огромна загуба, бидејќи пејачот починал само 40 дена по смртта на сопругата. Зад себе оставил двајца малолетни синови, кои за краток период останале без двајцата родители.
За загубата на Иванов на социјалните мрежи информираше неговиот пријател Васко Мавриков, посочувајќи дека децата сега се соочуваат со исклучително тежок период, во годините кога поддршката од нивните родители им е најпотребна.
По тажната вест, пријателите и блиските на семејството веднаш иницирале хуманитарна акција за собирање донации. Целта е да им се помогне на момчињата и да им се обезбеди поддршка додека се справуваат со ненадоместливата загуба.
Васко Мавриков ја објави веста на својот профил на Фејсбук, каде што упати повик до сите што го познавале Николај или неговото семејство, како и до оние што имаат можност да помогнат, да се приклучат кон акцијата.
„Со голема тага дознаваме дека оперскиот пејач Николај Иванов починал – само 40 дена по загубата на сопругата. Две деца остануваат без родители во моментот кога им се најпотребни.
Организираме акција за собирање донации со која сакаме да им помогнеме на неговите двајца синови и да им дадеме поддршка во овој исклучително тежок период.
Ве молам, ако го познававте Николај или неговото семејство, или едноставно имате можност да помогнете, приклучете се кон оваа акција. Секоја донација, без разлика на нејзината големина, е знак на емпатија и поддршка.
А понекогаш токму поддршката од луѓето е она што може да даде надеж во најтешките моменти“, напиша Мавриков.
