Грчката полиција разби наводна организирана мрежа за шверц на мигранти, која според истрагата пренела повеќе од 500 лица во и низ Грција. Во координирани полициски акции во северозападниот дел на земјата и во Солун биле уапсени вкупно 10 лица осомничени за учество во криминалната мрежа, за која се верува дека остварила незаконска заработка од најмалку 750.000 евра.
Истрагата открила 41 случај на организиран транспорт на мигранти, а утврдено е дека активностите на групата се одвивале најмалку од јуни 2025 година. Според сознанијата на полицијата, станувало збор за добро организирана шема преку која мигрантите биле префрлани на различни локации, а за секоја услуга им биле наплаќани високи суми пари.
Мигрантите биле државјани на Непал, Јемен и Кина, кои на грчка територија влегувале пеш, користејќи оддалечени планински патеки од Албанија. Нивната прва дестинација била северозападниот грчки регион Теспротија, каде што бил организиран нивниот привремен престој пред да продолжат кон други места во земјата.
Според полициските сознанија, осомничените им обезбедувале привремено сместување во конаци или во импровизирани шатори. На мигрантите им биле обезбедувани и храна, вода и СИМ-картички за мобилни телефони, но за овие услуги им наплаќале прекумерно високи износи.
Откако ќе пристигнеле во Грција и ќе поминеле одреден период во привремените сместувања, за нив бил организиран понатамошен транспорт. Најчесто биле превезувани со меѓуградски автобуси кон Атина и Патра, а во одредени случаи биле организирани и патувања до дестинации надвор од Грција.
Истрагата открила и сомневања дека дел од мигрантите биле испраќани на нелегална работа во земјоделски стопанства на Пелопонез. Во неколку случаи, осомничените наводно им ги одземале пасошите на мигрантите, користејќи ги како гаранција за долговите што ги имале за организираниот шверц.
Според наводите на полицијата, лицата кои не можеле веднаш да ги подмират трошоците биле принудени да ги отплаќаат преку работа.
Во рамките на акцијата, девет осомничени биле уапсени во Сагијада, населено место во регионот Теспротија, во близина на границата со Албанија, додека десеттото лице било приведено во Солун.
Меѓу уапсените има седум грчки државјани и тројца странски државјани, од кои двајца мажи од Сирија и една жена од Албанија. Полицијата информира дека во случајот е поврзан и 26-годишен осомничен со наводна улога во мрежата, кој веќе се наоѓа во притвор и го очекува судењето.
Дополнителните информации од истрагата укажуваат дека групата користела затворена комуникациска мрежа преку апликации за размена на пораки. На тој начин членовите ги координирале активностите, разменувале информации и го следеле движењето на полициските сили, со цел да ги избегнат контролите.
Покрај десетте осомничени, во текот на полициските активности биле уапсени и 21 странски државјанин кои немале документи со кои би го потврдиле легалниот престој во Грција. Петмина од нив биле пронајдени во домот на еден од осомничените, каде што, според сомневањата, нелегално работеле во неговиот бизнис.
При претресите на три станбени објекти и еден деловен простор, полицијата пронашла и запленила повеќе предмети за кои се верува дека можат да послужат како докази во истрагата.
Меѓу запленетите предмети се три автомобили, мобилни телефони и друга електронска опрема, 1.150 евра во готовина, како и четири пасоши.
Големата полициска операција била спроведена во соработка со Европол, а во неа учествувале полициски единици од Теспротија, Солун и Патра.
По завршувањето на акцијата, се очекува десеттемина уапсени осомничени да бидат изведени пред надлежните судски органи во Теспротија, каде што ќе продолжи постапката за утврдување на нивната евентуална одговорност за организирање шверц на мигранти и останатите активности што им се ставаат на товар.
